Psalms 47
1 למנצח לבני-קרח מזמור 2 כל-העמים תקעו-כף הריעו לאלהים בקול רנה 3 כי-יהוה עליון נורא מלך גדול על-כל-הארץ 4 ידבר עמים תחתינו ולאמים תחת רגלינו 5 יבחר-לנו את-נחלתנו את גאון יעקב אשר-אהב סלה 6 עלה אלהים בתרועה יהוה בקול שופר 7 זמרו אלהים זמרו זמרו למלכנו זמרו 8 כי מלך כל-הארץ אלהים— זמרו משכיל 9 מלך אלהים על-גוים אלהים ישב על-כסא קדשו 10 נדיבי עמים נאספו— עם אלהי אברהםכי לאלהים מגני-ארץ— מאד נעלה
Copyright information for
Alep